إيه هى علامات الكبت النفسي، و إزاي تقدري تحمي نفسك من إنك توصلي لمرحلة الإنفجار!
معظمنا عارف شخصية #هند_صبري (#علا_عبد_الصبور)، البنت اللي كان كل طموحها إنها تتجوز علشان خايفة من لقب (عانس) وبتحاول بكل الطرق هي ومامتها، إنها تصطاد عريس عشان تاخد لقب (مدام) بسبب الضغط النفسى من الأهل، والصحاب، والقرايب، والمجتمع عموماً اللي بيعايرها بسنها اللي بيكبر، وفرصتها اللي بتقل لحد ما خلوها تتجوز أى راجل! لمجرد إن يبقى إسمها متجوزة، كلنا تعايشنا مع قصتها وحبيناها في الجزء الأول #عايزة_اتجوز بعد كدا يبدأ الجزء التاني #البحث_عن_علا بطلاق علا من هشام، وتحول حياتها البسيطة الكلاسيكية اللي هي شيفاها مثالية من وجهة نظرها لحياة سريعة كلها تحديات لازم تواجهها، وتكون قدها، فبتحاول تحقق أحلامها، وطموحاتها القديمة اللي الجواز شغلها عنها، وسط كل دا علا بتفكر في الضغوط اللي اتعرضتلها من تحكمات جوزها، لحماتها اللي كانت مطالبة إنها تكون نسخة منها، وإحساسها بإنها ست اللي تقريباً نسيته. علا أصبحت قنبلة موقوتة هتنفجر! وتتحول لشخصية غير متزنة بتعمل تصرفات غير مناسبة لشخصيتها، ومبادئها، وبتاخد قرارات غير منطقية اطلاقاً!
علا تحولت كدا إزاي!
ببساطة علا تحولت بسبب #الكبت "كترالضغط يولد الإنفجار" كل شخص فينا عنده طاقة، وقوة تحمل مهما كان هيوصل في لحظة ما بعد الضغوطات الكتيرة دي وكبته لمشاعره، إنه ينفجر، والإنفجار، دا هيكون ليه عواقب كتيرة!
تعالى نفهم سوا ايه هوالكبت النفسي؛ و إزاي بيوصلنا للإنفجارالعاطفى و إزاي نتخلص منه.
الكبت النفسي:
كبت المشاعر أو ما يسمى بقمع المشاعر، هو طاقة نفسية متراكمة جوانا، نتيجة تعرضنا لمواقف بنحس فيها بمشاعر سلبية، ونتجاهلها كإنها مش موجودة، لسبب إرادى أو غير إرادى، زي عدم قدرتنا عن التعبير الكلامى، أو الفكري، أو الوجداني، أو بسبب شخصية الإنسان، أو بيئته.
الكبت النفسي بينتج عنه كمية من المشاعرالقوية، المندفعة من أعماق النفس، تؤثر على الشخص المنفجر عاطفياً، والطرف الأخر بنفس القوة، يفقد فيها الأنسان السيطرة على مشاعره، وسلوكه، هذه الظاهرة النفسية يطلق عليها "الإنفجار العاطفي"!
أظهرت دراسة أمريكية حديثة إن الفشل في التعبيرعن المشاعر، وقمع المشاعرالمختلفة، وعدم البوح بها وكبتها في الصدور من الأسباب التي تؤدي لحدوث الأمراض النفسية على الخصوص، والمؤدية إلى الوفاة في أغلب الأحيان كما تشير تفاصيل الدراسة الأميركية الصادرة عن كلية هارفارد للصحة العامة، بالتعاون مع جامعة روشستر، والتي أعدها مجموعة من العلماء، إلى أن النتائج أثبتت أن "مخاطر الوفاة المبكرة تتزايد بنسبته 35 % من بين الأشخاص الذين لا يحاولون التعبير عن مشاعرهم".
من علامات الكبت النفسي:
•إنك تتكلم بصيغة المخاطب بدل من ضميرالمتكلم تحديداً لما تتكلم عن مشاعرك.
•الميل في الكلام مع الآخرين للمواضيع السطحية، وتفادي الكلام الشخصى عن النفس، والمشاعر.
•المزاجية، والتناقض، في التعامل يعني الشخص اللي كل شويه بحال.
•الغضب الشديد لأسباب لا تستحق، والكلام بطريقة سلبية عن الآخرين.
•النظرة السلبية للنفس، بل وانعدام الثقة بالنفس.
من أهم أسباب الكبت النفسي:
•إننا متعلمناش نعبرعن مشاعرنا بطريقة صحية.
•الخوف من تأثير التعبيرعن مشاعرنا علي علاقاتنا بالاخرين.
•عدم الوعى الكامل بمشاعرنا وخطورة كبتها.
إزاي منوصلش لمرحلة البووووم "الإنفجار العاطفي"؟!
•لازم أعرف مشكلتى الحقيقة ايه عشان أقدر أعبر عنها.
•الدعم النفسي من ناس بنحبهم بيساعدونا نعبرعن اللي في قلبنا معاهم.
•دلعى نفسك عشان تتخلصى من الضغوط وتبقي خفيفة وتقدري تعبري عن نفسك.
•مارسى هوايتك المفضلة وركزى علي الإيجابيات عشان تعززى ثقتك بنفسك.
•ساعدى اللي محتاجلك هتحسي إن روحك المعنوية مرتفعة وسعيدة.
•تخلصي من القيود وأنطلقي في حدود المعقول.
•الدعاء، والصلاة، والتقرب إلي الله من أهم الأسباب اللي بتخلصك من الكبت، والحزن.
•إتعلمي من غلطك وبلاش لوم للنفس وجلد للذات وتقبلي عيوبك.
•إعرفي مشاعرك، و واجهى نفسك بالسبب الحقيقى اللي بيخليكي تكبتيها جواكي.
•متتجاهليش رغبتك في البكاء وتتظاهري إنك كويسة.
•لازم يكون عندك وقتك الخاص، ومتقضيهوش مع ناس مش عاوزة تكوني معاهم خوفاً على مشاعرهم علي حساب نفسك!
السؤال بقى، كام مرة قلت "نعم" مع إنك كنت عاوز تقول "لأ"؟
كتابة: آية عادل
